Қарттар мектебінде «Ас қорыту жүйесінің аурулары: созылмалы панкреатит» тақырыбында сабақ өткізілді
2026 жылғы 18 қарашада Қарттар мектебінде «Ас қорыту жүйесінің аурулары: созылмалы панкреатит» тақырыбында ақпараттық-ағартушылық сабақ өткізілді.
Сабақты салауатты өмір салты мамандары Жұмабаева Г.Т. және Тұруспекова Г.М., сондай-ақ дәрігер-геронтолог Шинибекова А.Н. жүргізді.
Сабақ барысында қатысушыларға созылмалы панкреатиттің даму себептері, аурудың негізгі белгілері, атап айтқанда іштің жоғарғы бөлігіндегі ауырсыну, жүрек айну, іштің кебуі және ас қорыту жүйесінің бұзылуы туралы толық ақпарат берілді. Сонымен қатар егде жастағы адамдарда аурудың өту ерекшеліктеріне және оның даму қаупін арттыратын факторларға, соның ішінде дұрыс тамақтанбау, алкогольді шамадан тыс тұтыну және ас қорыту жүйесінің қатар жүретін ауруларына ерекше назар аударылды.
Қатысушыларға созылмалы панкреатиттің асқынуының алдын алу шаралары түсіндіріліп, дәрігер ұсынған емдәмді сақтау, дұрыс әрі теңгерімді тамақтану, зиянды әдеттерден бас тарту және дер кезінде медициналық көмекке жүгінудің маңыздылығы атап өтілді.
Сондай-ақ дәрігер тағайындаған емді сақтау, денсаулық жағдайын тұрақты бақылау және өз бетінше емделуге жол бермеу жөнінде ұсыныстар берілді.
Осындай ақпараттық-ағартушылық сабақтар аға буын өкілдерінің медициналық сауаттылығын арттыруға, өз денсаулығына жауапкершілікпен қарауды қалыптастыруға және созылмалы аурулардың алдын алуға ықпал етеді.



